Ռուսաստանը դեռ կարող է հարձակվել Կիևի վրա. Պենտագոն

Պենտագոնի կարծիքով՝ ռուսական զորքերը կարող են շարունակել հրթիռային հարձակումները Կիևի և Ուկրաինայի այլ քաղաքների վրա։ Այս մասին ճեպազրույցում հայտարարել է Պենտագոնի խոսնակ Ջո Քիրբին։

«Այո, իհարկե, Ռուսաստանն ունի Կիևին հարվածելու կարողություն»,- ասել է Քիրբին՝ ի պատասխան Կրեմլի՝ այն պնդումների վերաբերյալ մեկնաբանությունների խնդրանքին, որ ՌԴ-ն մտադիր է իր հրթիռներն ուղղել Կիևի «որոշում կայացնող կենտրոնների վրա»:

Պենտագոնի խոսնակն ընդգծել է, որ նույնիսկ այն ժամանակ, երբ Ռուսաստանի Դաշնությունը սկսեց իր զորքերը դուրս բերել Կիևից, Չեռնիգովից, Ուկրաինայի հյուսիսային հատվածից, ԱՄՆ-ը չէր հավատում, որ Կիևը շրջանցել է վտանգները, հատկապես՝ օդից։

«Մենք բազմիցս խոսել ենք այդ մասին, նույնիսկ ռուսական զորքերի դուրսբերման և վերաբաշխման սկզբնական փուլում»,- հիշեցրել է ԱՄՆ պաշտպանության նախարարության պաշտոնյան: