Թուրքիան միակն է, որ ի վիճակի է առաջընթաց ապահովել Ռուսաստանի և Ուկրաինայի միջև բանակցություններում. Էրդողան

Թուրքիայի նախագահ Ռեջեփ Թայիփ Էրդողանը երեքշաբթի կարծիք է հայտնել, որ միայն Անկարան կարող է առաջընթաց ապահովել Ռուսաստանի և Ուկրաինայի միջև բանակցություններում։

«Այսօր Թուրքիան միակ երկիրն է, որը կարող է սերտ հարաբերություններ պահպանել երկու կողմերի հետ և ապահովել կոնկրետ առաջընթաց՝ կողմերի համախմբմամբ»,- ասել է Թուրքիայի նախագահը կառավարության նիստից հետո Անկարայում ունեցած ելույթում։

Էրդողանի խոսքով՝ Թուրքիան «խորապես զգում է ռուսական և ուկրաինական ճգնաժամի հետևանքները, հատկապես՝ էներգիայի և պարենային ապրանքների գների հետ կապված»։ «Մենք չենք կարող կանխել նավթի և բնական գազի գների էքսպոնենցիալ աճը, մեզ շատ անհանգստացնում է սննդի արդյունաբերության մեջ կիրառվող հումքի գների աճը»,- պարզաբանել է նա։

Ավելի վաղ ՌԴ նախագահ Վլադիմիր Պուտինը հայտարարել էր, որ Կիևը հեռացել է Ստամբուլում ռուս-ուկրաինական բանակցություններում ձեռք բերված պայմանավորվածություններից և գործընթացը վերադարձրել է փակուղի։