Կապան-Երևան նոր ճանապարհ կլինի, որը կշրջանցի Տաթևի ոլորանները․ Փաշինյան

Սյունիքում լայնածավալ ճանապարհաշինարարական աշխատանքներ են իրականացվում, մասնավորապես՝ Տաթև-Լծեն ճանապարհահատվածը, որը Սիսիանով պետք է միանա Մ2 ճանապարհին, և Վերին Խոտան գյուղը շրջանցող ճանապարհահատվածը մենք պլանավորում էինք այս տարի ավարտել, ինչ արդյունքում Կապան-Երևան կունենանք նոր ճանապարհ, հիմա ունենք, ևս մեկը կունենանք, որը կշրջանցի Տաթևի ոլորանները։ Այս մասին Կառավարության նիստում հայտարարեց վարչապետ Նիկոլ Փաշինյանը։

ՀՀ տարածքային կառավարման և ենթակառուցվածքների նախարար Գնել Սանոսյանը հայտնեց, որ Սյունիքի մարզի բոլոր նոր ավտոճանապարհներն այս տարի կասֆալտապատվեն։

«Սյունիքի ճանապարհներին ամբողջ ձմեռ աշխատանքներ արվել են։ Միայն վերջերս` շուրջ 10 օր է, առատ ձյան պատճառով աշխատանքները դադարեցվել են, բայց առաջիկա օրերին կշարունակվեն։ Տաթև–Լծենի շուրջ 20 կմ–անոց հատվածի ամբողջ հողային պաստառը պատրաստ է։ Շինարարական ընկերությունը վերջնական շտկումներն է անում, որպեսզի նախապատրաստվի ասֆալտապատման աշխատանքներին»– ասաց Սանոսյանը։