Թուրքիան սկսում է Kaplan MT տանկերի մատակարարումը Ինդոնեզիա

Թուրքիան սկսել է Ինդոնեզիայի զինված ուժերի կարիքների համար արտադրված Kaplan MT միջին տանկերի առաջին խմբաքանակի արտահանումը։

FNSS պաշտպանական ընկերության ղեկավար Նաիլ Քուրթը Anadolu-ին հայտնել է, որ տանկերի մատակարարման առաջին փուլը նախատեսվում է ավարտել մինչև այս տարեվերջ։

Նա հիշեցրել է, որ միջին տանկը թուրքական FNSS-ի և ինդոնեզական PT Pindad-ի համատեղ ջանքերի արդյունք է։

Քուրթի խոսքով՝ ապրիլ-մայիսին 18 տանկերից 10-ը կուղարկվի Ինդոնեզիա, որտեղ նախատեսվում է անցկացնել հավաքման վերջին փուլը։

«Բելգիայում հավաքված տանկային աշտարակը կտեղակայվի Ինդոնեզիայում։ Սա Ջակարտայի պահանջն է։ Մնացած տեղադրումն իրականացվում է Թուրքիայում»,- ասել է նա՝ նշելով, որ թուրքական Aselsan-ը նախատեսում է սկսել նաև զրահատեխնիկայի համար աշտարակների արտադրություն։

Պաշտպանական ընկերության ղեկավարը նշել է, որ միջին տանկերի նկատմամբ հետաքրքրություն է ցուցաբերվում մի շարք երկրներում։

Բացի դրանից, ըստ նրա, Թուրքիայի ԶՈւ-ն նույնպես նոր տանկերի կարիք ունի։