Փաշինյանին հանդիպած քաղաքացին ասել է, որ Հայաստանում արդարություն և արդարադատություն չկա

Կառավարությունն այսօրվա նիստում հաստատեց «Պաշտոնատար անձանց գործունեության ապահովման, սպասարկման և սոցիալական երաշխիքների մասին» օրենքում և կից օրենքների փաթեթում փոփոխություններ և լրացումներ կատարելու մասին նախագիծը։

Նախագծով նախատեսվում է, որ դատախազների ու քննչական մարմիններում ինքնավար պաշտոն զբաղեցնող անձանց համար կենսաթոշակային ապահովության միասնական պայմաններ կստեղծվեն։

Փաշինյանը նախագծի քննարկման ժամանակ ասաց, թե հանդիպել է քաղաքացիների հետ, որոնցից մեկն ասել է` Հայաստանում արդարություն և արդարադատություն չկա, իսկ դուք դատախազների, դատավորների, քննիչների աշխատավարձն եք բարձրացնում:

«Ես ասացի, որ այդ քայլերը ձեռնարկում ենք, որովհետև մենք խնդիր ենք դրել, որ ինստիտուցիոնալ կայացում տեղի ունենա։ Մենք դա անում ենք, որպեսզի հնարավորինս որակյալ արդարադատություն մատուցվի ՀՀ քաղաքացիներին»,- ասաց Փաշինյանը: