ՏԵՍԱՆՅՈՒԹ․ Հայաստանը և Իրանը կարող են նաև ռազմական համագործակցություն ունենալ․ Եղիա Թաշճյան

Բեյրութի Ամերիկյան Համալսարանի գիտաշխատող Եղիա Թաշճյանն առաջարկում է Սյունիքում Իրանի հյուպատոս և ռազմական կցորդ նշանակել՝ հայտնում է Yerkir.am-ը։

ԻԻՀ և ՀՀ միջև դիվանագիտական հարաբերությունների հաստատման 30-ամյակի առիթով ԳԱԱ-ում կազմակերպված «Հայաստան-Իրան․ պատմական անցյալը և ներկան» միջազգային գիտաժողովի ընթացքում իր ելույթում Թաշճյանը նշեց, որ Հայաստանը և Իրանը կարող են նաև ռազմական համագործակցություն ունենալ։

«Երբ ասում եմ ռազմական համագործոկցություն՝ պարտադիր չէ, որ ռազմական զորավարժություններ լինեն։ Անշուշտ նպատակը պետք է լինի տարածաշրջանում կայունություն ապահովելը։ Այդ իսկ պատճառով ինչպես Հայաստանի, այնպես էլ Իրանի մեջ պետք է ստեղծվի հետախուզական համագործակցության միասնական կենտրոն, որտեղ երկու կողմերը կկարողանան կիսել, վերլուծել և գնահատել տարածաշրջանային սպառնալիքներն ու ահաբեկչական գործողությունները»,-ասաց Եղիա Թաշճյանը։

Նա հիշեցրեց՝ ինչպես սիրիացի ահաբեկիչներն Արցախ հասան։

«Երբ տարիներ առաջ ասում էինք՝ այդպիսի վտանգ կա, Հայաստանում ոչ մեկը չէր հավատում»,-ասաց նա։

Այս գործընթացը հեշտացնելու համար, նրա համոզմամբ, երկու երկրների անվտանգության ծառայությունների միջև պետք է ստեղծվի ուղիղ կապ։

Ամբողջական ելույթը՝ տեսանյութով․