ԱՄՆ-ը նոր զորքեր է ուղարկում Լեհաստան

Չորս C-17A Globemaster III ռազմատրանսպորտային ինքնաթիռներ՝ ԱՄՆ բանակի 82-րդ օդադեսանտային դիվիզիայի ստորաբաժանումներով, ժամանել են Լեհաստան. հայտնում է «Ինտերֆաքս»-ը։

Աղբյուրի հաղորդմամբ՝ ինքնաթիռները օդ են բարձրացել Հյուսիսային Կարոլինայի Ֆորտ Բրագ բազայից և վայրէջք կատարել Լեհաստանի Ժեշով քաղաքի օդանավակայանում, որը գտնվում է Ուկրաինայի հետ սահմանից 90 կմ հեռու։

Լեհաստան է տեղափոխվել ԱՄՆ բանակի 18-րդ օդադեսանտային դիվիզիայի առնվազն 750 զինվոր։ Ընդհանուր առմամբ, այս վայրում կտեղակայվի մոտ 1,7 հազար ամերիկացի դեսանտային։

Ավելի վաղ Պենտագոնի խոսնակ Ջոն Քիրբին հայտնել էր Գերմանիա, Լեհաստան և Ռումինիա լրացուցիչ ռազմական ուժեր ուղարկելու մասին՝ կապված Ուկրաինայի շուրջը ստեղծված իրավիճակի հետ։ Միաժամանակ, նա պարզաբանել էր, որ իրենք «մտադիր չեն կռվել Ուկրաինայում», բայց «կապահովեն հուսալի պաշտպանություն» ՆԱՏՕ-ի դաշնակիցներին։