Կանադան Ուկրաինայից հետ է կանչում իր դիվանագետներին

Ռուսաստանի և Ուկրաինայի միջև լարվածության ֆոնին՝ Կանադան որոշել է Կիևից ժամանակավորապես հետ կանչել իր դեսպանատան «ոչ հիմնական աշխատակիցներին» և երկրում մնացած դիվանագետների հարազատներին։ Համապատասխան հայտարարությունը հրապարակվել է Կանադայի կառավարության կայքում։

Միևնույն ժամանակ, նշվում է, որ դիվանագիտական առաքելությունը կամրապնդվի փորձագետներով, որոնք մասնագիտացած են անվտանգության ոլորտի բարեփոխումների և հակամարտությունների կարգավորման ոլորտում։ Այսպիսով՝ Կիևում Կանադայի դեսպանատունը կշարունակի իր աշխատանքը։

Ավելի վաղ ԱՄՆ-ը, Մեծ Բրիտանիան և Ավստրալիան հայտարարել էին իրենց դիվանագիտական ներկայացուցչությունների աշխատակիցներին և նրանց ընտանիքների անդամներին Ուկրաինայից հեռացնելու մասին։ Դրանց հետո Գերմանիայի իշխանությունները հայտարարեցին, որ դա կարող են անել գերմանացի դիվանագետների հարազատները, որոնք ցանկանում են լքել Ուկրաինան՝ Գերմանիայի ԱԳՆ-ի հաշվին։ Կանադայի իշխանությունների որոշումը կայացվել է՝ չնայած Ուկրաինայի նախագահ Վլադիմիր Զելենսկիի կոչերին՝ չտարհանել օտարերկրյա դիվանագիտական ներկայացուցչությունների աշխատակիցներին։