Ֆրանսիայի արտգործնախարարը մեկնաբանել է Պեկրեսի հասցեին Ալիևի սպառնալիքները

Ֆրանսիացի պատգամավոր Էրիկ Չիոտին Սենատում դժգոհություն է հայտնել Ֆրանսիայի նախագահի թեկնածու Վալերի Պեկրեսի հասցեին Իլհամ Ալիևի հնչեցրած սպառնալիքներին նախագահ Էմանուել Մակրոնի արձագանքի բացակայության կապակցությամբ։ Պեկրեսն Արցախ էր այցելել հայկական երկրորդ պետության ժողովրդին աջակցելու համար։ ԱԳ նախարար Ժան-Իվ Լը Դրիանին ուղղված հարցում Չիոտին Ալիևին բռնապետ է անվանել՝ հարցնելով, թե ո՞րն է Մակրոնի լռության պատճառը։

Ի պատասխան Լը Դրիանն ասել է, որ նախագահի թեկնածուին ուղղված՝ Ադրբեջանի նախագահ Իլհամ Ալիևի խոսքերն իրենց ձևով և էությամբ անընդունելի են, ինչի մասին նա արդեն հայտնել է Փարիզում Ադրբեջանի դեսպանին։ Նա նաև հաստատել է Ֆրանսիայի աջակցությունը Հայաստանին։

Հիշեցնենք, որ Իլհամ Ալիևն իր հարցազրույցում ասել էր, որ եթե ադրբեջանական կողմն իմանար Պեկրեսի՝ Արցախ այցի մասին, «նրան չէին թողնի դուրս գալ Լաչինից»։