Կյանքը ցույց կտա. ՌԴ դեսպանը՝ ԼՂ–ում խաղաղապահների անժամկետ ներկայության մասին

Ղարաբաղում ռուս խաղաղապահների ներկայությունը կարևոր ներդրում է, որպեսզի մարդիկ այդ տարածաշրջանում ապրեն անվտանգության զգացողությամբ։ Այս մասին «Նոր սերունդ – 2021» համաժողովի շրջանակում, դեկտեմբերի 13-ին Երևանում լրագրողների հետ զրույցում ասաց Հայաստանում Ռուսաստանի արտակարգ և լիազոր դեսպան Սերգեյ Կոպիրկինը։

Դեսպանի կարծիքով՝ ռուսական խաղաղապահ զորակազմի դերն ու նշանակությունը անհնար է գերագնահատել։ «Կան կոնկրետ  պայմանավորվածություններ, և կա մեր խաղաղապահ զորակազմի կոնկրետ գործունեությունը։ Այն իսկապես  կարևոր ավանդ է ներդնում, որպեսզի մարդիկ այս տարածաշրջանում ապրեն անվտանգության զգացողությամբ և ապագայի տեսլականով։ Դա իսկապես խաղաղության և պոզիտիվի լուրջ և կարևոր գործոն է այսքան դժվարին իրավիճակում»,- նշեց դիվանագետը։

Խոսելով կողմերի հետագա գործողությունների և Ղարաբաղում խաղաղապահների անժամկետ ներկայության հնարավորության մասին՝ դիվանագետը, մասնավորապես, ասաց. «Կյանքը ցույց կտա»։