Իսրայելը հարվածել է Սիրիայի «ջրային դարպասին»` Լաթաքիայի նավահանգստին

Դեկտեմբերի 7-ի գիշերը Իսրայելի ռազմաօդային ուժերը գրոհել են Սիրիայի գլխավոր ծովային նավահանգիստը՝ երկրի արևմուտքում գտնվող Լաթաքիան։ Ռմբակոծության հետեւանքով նավահանգստում ուժեղ հրդեհ է բռնկվել, ուժեղ պայթյուններ են լսվել։ Այս մասին հայտնում է Սիրիայի պետական հեռուստատեսությունը։

Սիրիական լրատվամիջոցները մեղադրել են Իսրայելին՝ ցուցադրելով պայթյունների վայրում բռնկված խոշոր հրդեհի կադրերը:

Լրատվամիջոցները նշել են, որ հակաօդային պաշտպանությունը որսացել է հրթիռների մեծ մասը։ Միաժամանակ, նրանք հավելել են, որ «առանձին հրթիռներ հարվածել են Սիրիայի գլխավոր առևտրային նավահանգստի կոնտեյներային տեղամասին, որը կարևոր դեր է խաղում սննդամթերքի և առաջին անհրաժեշտության ապրանքների առաքման գործում»։ «Հրթիռային հարձակման արդյունքում մի քանի բեռնարկղեր բռնկվել են»,- հավելում է SANA-ն։

Զոհերի կամ ավերածությունների մասին տեղեկություններ չկան:

Նշվում է նաեւ, որ հրդեհի հետեւանքով Լաթաքիան ցնցվել է հինգ հզոր պայթյունից։ Սիրիացի հրշեջներին հաջողվել է մարել նավահանգստում բռնկված հրդեհը։