Ուկրաինային անօդաչու սարքերի մատակարարումը կապված չէ Դոնբասում լարվածության հետ. Թուրքիա

Թուրքիայի պաշտպանական արդյունաբերության ղեկավար Իսմայիլ Դեմիրը վստահ է, որ հարձակողական անօդաչու սարքերի մատակարարումը ոչ մի կերպ չի ազդել Մոսկվայի և Կիևի հարաբերությունների սրման վրա, քանի որ Ուկրաինան շատ երկար ժամանակ է, ինչ գնում է թուրքական անօդաչու սարքեր։

«Բայրաքթար» հետախուզական և հարվածային անօդաչու թռչող սարքերի մատակարարումները Ուկրաինա սկսվել են Մոսկվայի և Կիևի հարաբերությունների սրումից շատ առաջ. ասել է Թուրքիայի պաշտպանական արդյունաբերության ղեկավար Իսմայիլ Դեմիրը։ Ուստի անօդաչու սարքերը ոչ մի կապ չունեն վերջին իրադարձությունների հետ. հավելել է նա։

Ավելի վաղ Դոնբասում մարտական անօդաչու թռչող սարքերի թեման քննարկել են Վլադիմիր Պուտինն ու Թուրքիայի նախագահ Թայիփ Էրդողանը։ Ռուսաստանի ղեկավարն ասել է, որ Ուկրաինան շարունակում է խափանել Մինսկի պայմանավորվածությունները։ Խոսքը, մասնավորապես, վերաբերում է «Բայրաքթար» անօդաչու թռչող սարքի օգտագործմանը. գրում է ՏԱՍՍ գործակալությունը։

Մինչդեռ Bloomberg-ը կարծում է, որ Թուրքիան Ուկրաինային շատ ավելի շատ անօդաչու թռչող սարքեր է մատակարարել, քան հայտնի է։ Խոսքը մի քանի տասնյակ սարքերի մասին է։

Հիշեցնենք, որ հոկտեմբերի 26-ին Ուկրաինայի զինված ուժերը հայտարարել էին, որ Դոնբասում առաջին անգամ օգտագործվել է թուրքական արտադրության Bayraktar TB2 հարվածային անօդաչու թռչող սարք։ Անօդաչու թռչող սարքը հարձակվել է Դ-30 հաուբիցի վրա, որն իբր կրակել է ուկրաինացի զինվորականների ուղղությամբ։