Իրանի հյուսիս-արևմուտքում ահաբեկչական խմբավորում է ոչնչացվել

Իրանում Իսլամական հեղափոխության պահապանների կորպուսի (ԻՀՊԿ) ցամաքային ուժերը Սարդաշտում ոչնչացրել են ահաբեկչական խմբավորում. ասվում է Իսլամական հեղափոխության պահապանների կորպուսի հասարակայնության հետ կապերի բաժնի տարածած հաղորդագրության մեջ։ Այս մասին հոկտեմբերի 28-ին հայտնել է իրանական IRNA գործակալությունը։

«Համզե Սեյեդ օֆ Շոխոդա» բազայի ցամաքային ուժերը ուղիղ առճակատման մեջ են մտել մի խումբ ահաբեկիչների և հակահեղափոխականների հետ, որոնք փորձել են ներթափանցել և դիվերսիոն գործողություն կատարել երկրի հյուսիսարևմտյան շրջանում: Հասարակայնության հետ կապերի բաժնի հաղորդմամբ՝ ԻՀՊԿ-ի ուժերին հաջողվել է կանխել հնարավոր ահաբեկչությունները և ձերբակալել ահաբեկիչներին։

Բացի դրանից՝ Սարդաշտում ահաբեկչական խմբավորման ոչնչացման մարտավարական գործողության ընթացքում երկրի իրավապահ մարմինները առգրավել են որոշակի քանակությամբ զենք-զինամթերք։

Սարդաշտի շրջանը գտնվում է Արևմտյան Ադրբեջան նահանգի հարավ-արևմուտքում՝ Իրանի և Իրաքի սահմանների մոտ։