ԵՄ-ն ձգտում է համաձայնության հասնել Թուրքիայի հետ՝ Կիպրոս գաղթականների հոսքը դադարեցնելու համար

Եվրամիությունը կարող է ուղիներ մշակել՝ դադարեցնելու  համար միգրանտների հոսքը Թուրքիայից դեպի Կիպրոս և ԵՄ այլ երկրներ, երբ հաջորդ ամիս բարձր մակարդակի բանակցություններ վարի Անկարայում. հայտարարել է Եվրամիության ներքին գործերի հանձնակատար Իլվա Յոհանսոնը։

«Անհնարին բան չկա ուղի գտնելու համար, որը կկանխի միգրանտների հոսքը Թուրքիայից Կիպրոս, քանի որ Կիպրոս ժամանողների թիվը շատ մեծ չէ` Թուրքիայի կողմից ընդունած փախստականների հսկայական թվի համեմատ»,- ասել է նա, բայց, ըստ հունական Kathimerini թերթի, չի կարողացել նշել, թե ինչպիսին կլինի գործարքը:

Յոհանսոնն ասել է, որ կցանկանար առաջին ձեռքից իմանալ բաժանված Կիպրոսի առջև ծառացած դժվարությունների մասին:

«Մենք բախվել ենք բազմաթիվ խնդիրների Թուրքիայի հետ մեր հարաբերություններում: Այժմ մենք գտնվում ենք մի իրավիճակում, երբ այդ հարաբերությունները բարելավվում են»,- շեշտել է նա Կիպրոսի ներքին գործերի նախարար Նիկոս Նուրիսի հետ բանակցություններից հետո: