Թբիլիսիում և Բաթումում Իսրայելին սատարող ակցիաներ են անցկացվել

Երեկ Թբիլիսիում և Բաթումում Իսրայելին սատարող ակցիաներ են անցկացվել: Այս մասին հայտնում է «Ռուսթավի 2» հեռուստաալիքը:

Վրաստանի մայրաքաղաքում ցույցը կազմակերպվել էր մի քանի հասարակական կազմակերպությունների, այդ թվում՝ Israel House-ի նախաձեռնությամբ: Ակցիան տեղի է ունեցել Ռիկե այգում: Դրան միացել են հասարակական գործիչներ և վրացական շոու բիզնեսի աստղեր: Մասնակիցներն ունեցել են Վրաստանի և Իսրայելի պետական դրոշներ, ինչպես նաև պաստառներ՝ «Մենք կանգնած ենք Իսրայելի կողքին» գրությամբ: Նրանք համերաշխություն են հայտնել հրեական պետությունում բնակվող վրացիներին և հայտարարել, որ դատապարտում են ահաբեկչությունը:

«Նման իրավիճակում շատ կարևոր է ամբողջ քաղաքակիրթ աշխարհի համերաշխությունը Իսրայելի հետ: Վրաստանն իր աջակցությունն է հայտնում Իսրայելին, և մենք՝ ոչ պետական հատվածը, քաղաքացիական հասարակությունը, իրականացնում ենք այս ակցիան»,- ասել է Israel House-ի տնօրեն Գեորգի Բերնշտեյնը: