Ոչ ոք չի մոռացվել, ոչինչ չի մոռացվել . Բջնիի դպրոցականների հուշ-ցերեկույթը

Ողբերգական պատերազմի հետևանքով մենք կորցրինք մեր ոսկե սերնդից լավագույններին, որոնց համար հող հայրենին թանկ էր ամեն ինչից: Մեր լավագույն զավակների կորստի ցավին դիմակայելը թեպետ դժվար է, բայց ճիշտ ճանապարհը, ցավն արհամարհելով,  կրկին  ապրելն է, ու փյունիկի նման նորից կրակներից վեր հառնելը:

Ահա այսպիսի նշանաբանով Կոտայքի մարզի Բջնիի Հովհաննես Թումանյանի անվան դպրոցի անձնակազմը  հուշ-ցերեկույթ էր կազմակերպել գյուղի անհայտ զինվորի հուշարձանի տարածքում:

Բջնեցիները  անմնացորդ նվիրվածությամբ մասնակցել են և' սովետական ժողովուրդների հայրենական մեծ պատերազմին, և' արցախյան երկու պատերազմներին:  Վերջին պատերազմում անմահացան 19-ից 20 տարեկան երեք բջնեցի:  Եվս մեկն էլ իր կյանքը հող հայրենիին էր ավանդել 2016-ի ապրիլյան պատերազմում:

Ու թեպետ դժվար է, բայց  Բջնիի երեխաները իրենց մեջ ուժ են գտել, խեղդել վիշտը և այսօր մեծարում ու փառաբանում են իրենց հերոսներին՝ մեծ հավատով, որ մենք դեռ կվերադառնանք Շուշի: