Լավրովը հայտնել է, որ Ռուսաստանը նախատեսում է «Sputnik V»-ի նոր առաքումներ դեպի Հայաստան

Առաջիկա ամիսներին Ռուսաստանը նախատեսում է «Sputnik V» պատվաստանյութի նոր առաքումներ դեպի Հայաստան, քննարկվում է 1 միլիոն դեղաչափ մատակարարելու հնարավորությունը: Այս մասին հինգշաբթի հայտնել է Ռուսաստանի արտաքին գործերի նախարար Սերգեյ Լավրովը:

«COVID-19 համաճարակի սկզբից մենք սերտորեն համագործակցում ենք, Ռուսաստանը օգնություն է տրամադրում Հայաստանին կորոնավիրուսային վարակի տարածումը կանխելու հարցում: «Sputnik V» պատվաստանյութերի մի խմբաքանակ առաքվել է անվճար: Անցյալ ամիս ժամանել է այս պատվաստանյութի մեկ այլ խմբաքանակ`15 հազար դեղաչափ: Մոտակա ժամանակները նախատեսվում են լրացուցիչ առաքումներ, մշակվում է մեր հայ ընկերների խնդրանքը 1 միլիոն դեղաչափ տրամադրելու վերաբերյալ»,- ասել է նա  Հայաստանի արտաքին գործերի նախարարի պաշտոնակատար Արա Այվազյանի հետ հանդիպման ժամանակ: