Թուրքիան «սառեցնում» է իտալական ուղղաթիռների գնումը

Իտալական «La Repubblica» թերթը գրում է, որ Անկարան որոշել է «սառեցնել» տասը  ուղղաթիռների գնումը  Իտալիայից՝ «վրեժ լուծելու» համար Իտալիայի վարչապետ Մարիո Դրագիի հայտարարությունների համար, որը հինգշաբթի թուրք նախագահ Ռեջեփ Թայիփ Էրդողանին «բռնապետ» էր անվանել:

Մասնավորապես, ըստ թերթի, «սառեցված» է տասը  AW169 ուղղաթիռների գնումը  իտալական Leonardo խմբից, որի շուրջ բանակցություններ են վարվում մարտից: Գործարքի ընդհանուր արժեքը հասնում է 70 միլիոն եվրոյի, լրացուցիչ համաձայնագրերի հնարավորությամբ՝ 150 միլիոն եվրո ընդհանուր արժեքով:

Թերթը հիշեցնում է, որ երկու երկրների միջեւ ապրանքաշրջանառությունը գերազանցում է տարեկան 17 միլիարդ եվրոն: