Թուրքիայի ՊՆ ղեկավարը պատմել է ռուսաստանցի գործընկերոջ հետ բանակցությունների մասին

Թուրքիայի պաշտպանության նախարար Հուլուսի Աքարը հայտնել է, որ իր ռուսաստանցի գործընկեր Սերգեյ Շոյգուի հետ ինքը կառուցողական հեռախոսային բանակցություններ է վարել սիրիական Իդլիբում տիրող իրավիճակի շուրջ:

«Սերգեյ Շոյգուի հետ բանակցությունները շատ կառուցողական էին: Մենք պայմանավորվեցինք միջոցներ ձեռնարկել Իդլիբում հրադադարի ռեժիմի խախտման դեմ»,- նշել է Աքարը:

Նրա խոսքով՝ նպատակը կայուն հրադադարի ռեժիմի ապահովումն է:

Ավելի վաղ ռուսական կողմը Անկարային Իդլիբի ապաէսկալացման գոտում գտնվող Սերաքաբ և Միզնազ անցակետերը, ինչպես նաև Հալեպ նահանգում գտնվող Աբու Զեյդին անցակետի աշխատանքը  վերականգնելու առաջարկ էր ուղարկել:

Մարտի 22-ին հաղորդվել է, որ ահաբեկիչները հրթիռներ են արձակել Հալեպի Ալ Սալիհին և Ալ Ֆիրդաուս թաղամասերի ուղղությամբ, երկու քաղաքացիական անձ էր զոհվել, առնվազն 17-ը՝ վիրավորվել:

Դրանց առաջ էլ թուրքական վերահսկողության տակ գտնվող տարածքներից ականանետային հարձակումներ էին իրականացվել։