Հայաստանի իշխանությունները պետք է ծնկի իջնեին ժողովրդի առաջ կամ ինքնասպան լինեին. Ռոբերտ Քոչարյան

Հայաստանի իշխանությունները եթե արժանապատվության զգացում ունենային, ապա պետք է ինքնասպան լինեին Ղարաբաղի վերաբերյալ եռակողմ հայտարարությունը ստորագրելուց հետո: Այս մասին հինգշաբթի ռուսական լրատվամիջոցների համար մամուլի ասուլիսում ասաց ՀՀ երկրորդ նախագահ Ռոբերտ Քոչարյանը:

«Նոյեմբերի 10-ին իշխանությունները պետք է ծնկի իջնեին և ներողություն խնդրեին ժողովրդից: Եվ եթե նրանք արժանապատվություն ունենային, ապա ինքնասպան պիտի լինեին»,- նշեց նա:

Ըստ Քոչարյանի՝ եթե ներկայիս իշխանությունները իսկապես մտածեին երկրի մասին, ապա իրենց տեղը կզիջեին մարդկանց, որոնք ունակ են բանակցել:

«Իհարկե, մեզ դուր չի գալիս համաձայնագիրը: Բայց լավ պայմանավորվածություն ունենալու համար պետք է պատերազմներ հաղթել կամ գոնե չպարտվել: Ստորագրված փաստաթուղթը շարադրված է 1,5 էջում: Նման հարցերը չեն կարող լուծվել 1,5 էջով: Պետք է առանձին մանրամասների վերաբերյալ մշակել բազմաթիվ փաստաթղթեր»,- ասել է նա։

Ըստ նախագահի՝ իշխանություններն ի վիճակի չեն դա անել՝ ո՛չ մտավոր, ո՛չ մասնագիտական, ո՛չ էլ բարոյական առումով: Քոչարյանը նշել է, որ Հայաստանի ներկայիս կառավարությունը չի կարող համարժեք բանակցություններ վարել Ղարաբաղի հարցի շուրջ: