ԱՄՆ-ի կարծիքով՝ Վրաստանը հետքայլ է կատարել ժողովրդավարությունից

Վրաստանը հետքայլ կատարեց եվրաատլանտյան ընտանիքին պատկանող պետությունների ժողովրդավարական ուղուց՝ ձերբակալելով նախկին նախագահ Միխեիլ Սահակաշվիլիի հիմնադրած ընդդիմադիր «Միացյալ ազգային շարժում» կուսակցության ղեկավար Նիկա Մելիային: Այս մասին ասվում է երեքշաբթի Թբիլիսիում ԱՄՆ դեսպանության տարածած հայտարարության մեջ:

«ԱՄՆ դեսպանատունը ծայրաստիճան անհանգստացած է կառավարության՝  առավոտյան գրասենյակում գլխավոր ընդդիմադիր կուսակցության առաջնորդին ձերբակալելու որոշմամբ: Մենք ցավում ենք, որ ԱՄՆ-ի և այլ միջազգային գործընկերների՝ զսպվածության և երկխոսության կոչերն անտեսվել են: Մենք անհանգստացած ենք իշխանությունների կիրառած պառակտիչ հռետորաբանությունից: Վրաստանը հետքայլ է արել եվրաատլանտյան ընտանիքին պատկանող պետությունների ամուր ժողովրդավարական ուղուց»,-  ասվում է հայտարարության մեջ: