Թուրքիայից երկրորդ բեռնատար գնացքն է մեկնել Չինաստան՝ Վրաստանի տարածքով

Թուրքիայից արտահանման ապրանքներով երկրորդ բեռնատար գնացքն է մեկնել արևելյան Կարսի նահանգից Վրաստան: Այս մասին հաղորդում է թուրքական «Անադոլու» գործակալությունը:

Ստամբուլի մերձակայքում գտնվող Չերքեզքյոյ կայարանից Չինաստան մեկնող՝ 42 վագոնով գնացքը չորեքշաբթի հասել է Կարս: Մաքսային ընթացակարգեր անցնելուց հետո գնացքը շարժվել է դեպի Վրաստանի Ախալքալաք քաղաք:

Գնացքի միջազգային երթուղին անցնում է Վրաստանով, Ադրբեջանով, Կասպից ծովով և Ղազախստանով: Վերջնական նպատակակետը Չինաստանի Սիան քաղաքն է:

Երթուղու ընդհանուր երկարությունը 8693 կմ է (2 մայրցամաք, 2 ծով և 5 երկիր):

Վրաստանով անցնող Բաքու-Թբիլիսի-Կարս երկաթուղին Եվրոպան և Ասիան կապող միջանցքի լոգիստիկ մասն է: Երկաթուղին փորձնական ռեժիմով գործում է 2017 թվականից:

Առաջին նման բեռնատար գնացքը Ստամբուլից մեկնել է դեկտեմբերի 4-ին, իսկ Վրաստան է մտել դեկտեմբերի 8-ին: