Նախիջևանում Իրանն ու Ադրբեջանը քննարկել են Խուդաֆերինի և Արաքսի վրա գտնվող այլ ամբարտակների շահագործման հարցը

Դեկտեմբերի 14-ին Նախիջևանում տեղի է ունեցել Իրանի և Ադրբեջանի համատեղ տեխնիկական հանձնաժողովի նիստ`Խոդաաֆարին և Գըզ-Գալասը ամբարտակների, ինչպես նաև Օրդոբադ և Մարազադ հիդրոէլեկտրակայանների համագործակցության և շահագործման վերաբերյալ: Այս մասին դեկտեմբերի 15-ին հայտնել է իրանական IRNA գործակալությունը:

Հանդիպման ընթացքում կողմերը մտքեր են փոխանակել, թե ինչպես կարելի է շարունակել համագործակցությունն այդ նախագծերի շուրջ: Համատեղ տեխնիկական հանձնաժողովի նիստերը կանցկացվեն երեք փուլով. հաղորդում է IRNA-ն՝ հղում անելով Նախիջևանում Իրանի գլխավոր հյուպատոսությանը:

2016-ին Թեհրանում Իրանի և Ադրբեջանի միջև ստորագրվել էր ամբարտակների և էլեկտրակայանների կառուցման ու շահագործման մասին համաձայնագիրը, որը հաստատվել է երկու երկրների խորհրդարանների կողմից: Այս էներգետիկ ծրագրի իրականացման համար արդեն ստեղծվել է համատեղ տեխնիկական հանձնաժողով, որը կազմված է Ադրբեջանի և Իրանի էներգետիկայի ոլորտի պաշտոնյաներից և փորձագետներից:

Օրդոբադի և Մարազադի ամբարտակների կառուցման և շահագործման մասին համաձայնագիրը  ստորագրվել է Թեհրանում 2014 թ.-ին: