ՏԵՍԱՆՅՈՒԹ․ Շիրակի մարզում փակել են միջպետական մայրուղին և պահանջում են Փաշինյանի հրաժարականը

«Դավաճան, հողատու Նիկոլ Փաշինյանի դեմ անհնազանդության ակցիաների շրջանակներում այս պահին փակել ենք Գյումրի-Բավրա միջպետական մայրուղին: Մեր նպատակն է, որ ևս մեկ անգամ իրազեկենք մեր քաղաքացիներին Նիկոլի հերթական դավաճանության մասին»,- այս մասին ուղիղ տեսակապով նշեց Շիրակի մարզի բնակիչներից մեկը՝ ավելացնելով, որ ակցիայի միջոցով պահանջում են Փաշինյանի հրաժարականը:

Բողոքի մեկ այլ մասնակից, կրկին ուղիղ տեսակապի միջոցով հայտնեց հետևյալը. «Մենք Հայաստանի հյուսիսում ենք, և պիտի ժողովուրդը հասկանա, որ ամբողջ Հայաստանն է վտանգված էս դեպքում, խոսք չի գնում միայն Արցախի, Մեղրիի ու Սյունիքի մասին: Հայաստանն ամբողջովին վտանգված է, Հայաստանում չկա ոչ սահմանամերձ տարածք, Հայաստանի ցանկացած տարածք  հասանելի է մեր չորս կողմից շրջապատված թշնամիներին: Եթե մենք էսքանն ամբողջապես չհասկանանք և չփորձենք սրա դեմն առնել, չփորձենք ամրանալ դարեդար փոխանցված մեր պապենական հողի վրա, ուրեմն հարց է առաջ գալիս՝ մնալու՞ ենք էստեղ, ապրելու՞ ենք էստեղ մեր ձագերի հետ, մեր ծնողների, մեր պապերի հետ, մեր պապերի գերեզմանների կողքին, ուժե՞ղ ենք լինելու, ուրեմն ուժեղ ենք լինելու ազգովին: Չկա՛ հարավ, չկա՛ հյուսիս, կա մեկ Հայաստան: Հայաստանն էս պահին ունի խնդիրներ, որոնց լուծումը տեսնում ենք Կառավարության հրաժարականի մեջ»:

Հիշեցնենք՝ այսօր Շիրակի մարզի մի խումբ քաղաքացիներ փակել էին Գյումրի-Բավրա միջպետական մայրուղին և պահանջում էին Փաշինյանի հրաժարականը: