Նյու Յորքի «Մետրոպոլիտեն» թանգարանը կոչ է արել պաշտպանել Արցախի հայկական մշակութային օբյեկտները

Նյու Յորքի «Մետրոպոլիտեն» արվեստի թանգարանը կոչ է արել պաշտպանել Լեռնային Ղարաբաղի (Արցախ) հայկական մշակութային ժառանգության օբյեկտները. հայտնում է armmuseum.ru-ն։

Այս հայտարարությունն արել է թանգարանի ղեկավարությունը՝ նախագահ և գործադիր տնօրեն Դանիել Ուայսը և տնօրեն Մաքս Հոլլյայնը:

«Լեռնային Ղարաբաղում վերջին արյունահեղությունն ու ավերածությունները համաշխարհային ողբերգություն են, որոնք լուրջ անհանգստություն են առաջացնում բոլորիս համար: Կոչ անելով և հույս ունենալով վերջ դնել բռնությանը՝ մենք՝ որպես թանգարանի ղեկավարներ, նաև կոչ ենք անում պաշտպանել մշակութային ժառանգության օբյեկտները:

Մենք ներգրավված բոլոր կողմերին խնդրում ենք հարգել Համաշխարհային ժառանգության օբյեկտները, որոնք հարստացրել են մեր աշխարհը և գոյատևել հազարավոր տարիներ: Մշակութային ժառանգության օբյեկտների կորուստն անդառնալի է և անուղղելի կորուստ ապագա սերունդների համար»,- նշվում է հայտարարության մեջ: