Էրդողանի կնոջ պայուսակն օրիգինալ ֆրանսիական չէ. թուրք լրագրող

Hürriyet-ի լրագրող Հանդե Ֆըրաթն անդրադարձել է Թուրքիայի նախագահի կնոջ՝ Էմինե Էրդողանի մասին վերջերս տարածված խոսակցություններին, որ նա կրում է ֆրանսիական Hermes ֆիրմայի պայուսակ։

Հիշեցնենք, որ, ֆրանս–թուրքական հարաբերությունների լարվածության ֆոնին, Էրդողանը կոչ էր արել իր քաղաքացիներին՝ հրաժարվել ֆրանսիական ապրանքանիշերի արտադրանքից, սակայն հաջորդ օրը լրատվամիջոցները պարզեցին, որ նախագահի կինը կրում է ֆրանսիական ընկերության արտադրանք։ Թեմային անդրադարձել է նույնիսկ գլխավոր ընդդիմադիր Հանրապետական–ժողովրդական կուսակցության առաջնորդ Քեմալ Քըլըչդարօղլուն։

Ֆըրաթը գրում է, որ Էմինեն պարզապես փորձում է օրիգինալին մոտ պայուսակ կրել և նման արժողությամբ պայուսակ չունի, նախընտրում է տեղական արտադրանքը և կրում է ոչ օրիգինալը։

Հիշեցնենք, որ Ֆըրաթը մերձիշխանական լրագրող է. հենց նրա հաղորդման ժամանակ էր Էրդողանը 2016 թ. հուլիսի 15-ին՝ ռազմական հեղաշրջման փորձի ժամանակ, ուղիղ եթեր դուրս եկել և կոչ արել քաղաքացիներին՝ դուրս գալ փողոցները և կանխել հեղաշրջումը։