Զոհրաբ Մնացականյանը հանդիպել է ալ-Ազհար մզկիթի գերագույն իմամի հետ

Եգիպտոսի Արաբական Հանրապետություն պաշտոնական այցի շրջանակներում ՀՀ ԱԳ նախարար Զոհրաբ Մնացականյանը սեպտեմբերի 14-ին հանդիպել է ալ-Ազհար մզկիթի գերագույն իմամ շեյխ Ահմադ Մուհամմադ ալ-Տայիբի հետ։ Այս մասին հայտնում են ԱԳՆ-ի լրատվության ծառայությունից։

Հանդիպմանը կարեւորվել է հայ-եգիպտական դարավոր բարեկամությունը՝ խարսխված երկու ժողովուրդների միջեւ համերաշխության եւ փոխադարձ հարգանքի զգացումներով:

«Հիրավի գնահատելի է Եգիպտոսի կառավարության ջերմ եւ հոգատար վերաբերմունքը հայ համայնքի նկատմամբ, ինչի շնորհիվ հայերը կարողացան պահպանել իրենց լեզուն, մշակույթը, կրոնը եւ ազգային ինքնությունը»,- ասել է Զոհրաբ Մնացականյանը՝ հավելելով, որ «կրոնական հանդուրժողականության եւ փոքրամասնությունների իրավունքների պաշտպանության տեսանկյունից Եգիպտոսի փորձառությունը կարող է լավ օրինակ ծառայել»:

Երկուստեք մտահոգիչ է համարվել  աշխարհի տարբեր անկյուններում ծայրահեղական դրդապատճառներով հանցագործությունները եւ կրոնական հիմքի վրա խտրականության դրսեւորումները եւ քաղաքական նպատակներով կրոնի շահարկումը:

Այս համատքեստում զրուցակիցները շեշտել են միջկրոնական հանդուրժողականության եւ համերաշխ համակեցության կարեւորությունը:

Նախարար Մնացականյանը նշել է, որ Հայաստանը միջազգային տարբեր ձեւաչափերով հետեւողականորեն աշխատում է կրոնական խմբերի իրավունքների պաշտպանության, կրոնների բազմազանության ապահովման ուղղությամբ: