Ավստրալացի պատգամավորը դատապարտել է Ադրբեջանի ագրեսիան ընդդեմ Հայաստանի

Հյուսիսային Սիդնեյի դաշնային պատգամավոր, Ավստրալիայի խորհրդարանի անդամ Տրենթ Զիմմերմանը դատապարտել է Հայաստանի դեմ Ադրբեջանի վերջին ագրեսիան «համաճարակի քողի ներքո» և Մեծամորի ատոմակայանը ռմբակոծելու Բաքվի սպառնալիքը «արտակարգ» և «անընդունելի» համարել. հայտնում է Ավստրալիայի ՀՅԴ Հայ դատի հանձնախումբը։

«Ադրբեջանական նախորդ ագրեսիան ուղղված էր վիճելի Արցախի Հանրապետության դեմ: Սակայն այս անգամ ադրբեջանական ուժերը հարձակվել են Հայաստանի վրա՝ օգտագործելով տանկ, անօդաչու սարքեր և հրետանային կրակ զինվորների, քաղաքացիական տների և նույնիսկ գյուղական մանկապարտեզի վրա, մինչդեռ Ադրբեջանի մայրաքաղաք Բաքվի փողոցներում մարդիկ վանկարկում էին «Մահ Հայաստանին» և «Դադարեցրեք կարանտինը, պատերազմ սկսեք»- ասել է Զիմերմանը դաշնության պալատում:

«Բախումը տեղի է ունեցել լիովին արհամարհելով ՄԱԿ-ի կողմից համաշխարհային զինադադարի կոչը ներկայիս կորոնավիրուսային պանդեմիայի ժամանակ», - հավելել է նա: