Հայկ Մարությանը պիտակավորել է լրագրողների մասնագիտական աշխատանքը․ Մեդիապաշտպան

Հայկ Մարությանը պիտակավորել է լրագրողների մասնագիտական աշխատանքը։ Այս մասին ասվում է «Մեդիա պաշտպան» նախաձեռնության ֆեյսբուքյան էջում տեղադրված հաղորդագրության մեջ։

«Երևանի քաղաքապետ Հայկ Մարությանը օգոստոսի 18-ին, անդրադառնալով մամուլում շրջանառվող իր հավանական հրաժարականի մասին լուրին, պիտակավորել է լրագրողների մասնագիտական աշխատանքը և լրատվականները բաժանել «նախկինների ու ներկաների»։

Սա անընդունելի մոտեցում է։ Քաղաքապետը կարող է անհամաձայնություն ունենալ լրատվականի այս կամ այն հրապարակման հետ, հերքել հրապարակված լուրը, բայց պիտակավորել և քաղաքապետին ոչ վայել կեցվածքով հանդես գալ լրատվականների հետ դիսկուրսում անթույլատրելի է։

«Մեդիա պաշտպան» նախաձեռնությունը հորդորում է քաղաքապետին չթիրախավորել ազատ խոսքը, հարգալից խոսել լրագրողների մասնագիտական աշխատանքի մասին և հայտնել իր անհամաձայնությունը պետպաշտոնյային վայել՝ հաշվի առնելով էթիկայի կանոնները»,- ասված է գրառման մեջ։