Մենք կանենք հնարավոր ամեն ինչ`Հայաստանի և Ադրբեջանի միջև լարվածությունը նվազեցնելու համար. ՌԴ ԱԳՆ

Ռուսաստանը կօգտագործի բոլոր հնարավորությունները`կարգավորելու Հայաստանի և Ադրբեջանի միջև առկա սրումը: Այս մասին հայտարարել է Ռուսաստանի փոխարտգործնախարար Անդրեյ Ռուդենկոն՝ ՏԱՍՍ-ի հետ հարցազրույցում:

«Ես կարող եմ միայն հավաստիացնել, որ մենք կանենք հնարավոր ամեն ինչ և ցույց կտանք ռուսական դիվանագիտության բոլոր լավագույն որակները, հանրային դիվանագիտությունը, որպեսզի ոչ միայն կարգավորենք ներկայիս սահմանային հակամարտությունը, այլ ընդհանուր առմամբ բարելավենք եղբայրական և մերձավոր երկրների՝ Հայաստանի և Ադրբեջանի միջև հարաբերությունները:

Ռուսաստանը նման հնարավորություններ ունի, մենք դրանք օգտագործել ենք մեկից ավելի անգամ, ներառյալ՝ 2017 թվականին (հավանաբար Ռուդնենկոն նկատի է ունեցել 2016 թ. քառօրյա բախումները՝ խմբ.) Լեռնային Ղարաբաղի շուրջ ռազմական գործողությունների վերջին բռնկման ժամանակ: Վստահ եմ, որ մեր բոլոր հնարավորությունները կօգտագործվեն», - ասել է նա: