Ադրբեջանում «Ղարաբաղի կոմիտեն» մեղադրել է իշխանություններին «բռնազավթված տարածքները» հետ վերադարձնել չկարողանալու մեջ

Ադրբեջանում ոմն հասարակական «Ղարաբաղ կոմիտե» կազմակերպություն հանդես է եկել հայտարարությամբ, որում քննադատում է Ադրբեջանի իշխանությունների քաղաքականությունը երկրի տարածքային ամբողջականությունը վերականգնելու ուղղությամբ. հայտնում է «Թուրան» գործակալությունը։

Մասնավորապես, հայտարարության հեղինակները մեղադրում են կառավարությանը անգործության մեջ՝ կապված Հայաստանի և «գրավյալ տարածքների» միջև նոր ժամանակակից հաղորդակցությունների հաստատման, այնտեղ նոր բնակավայրերի կառուցման, Հայաստանի ղեկավարության անխոչընդոտ ուղևորությունների և տարբեր միջոցառումների մասնակցելու հետ՝ ներառյալ Արցախի նորընտիր նախագահ Արայիկ Հարությունյանի երդմնակալությունը Շուշիում:

Հասարակական «Ղարաբաղ կոմիտե»-ն, հաշվի առնելով վերը նշվածը, եզրակացնում է, որ «Ադրբեջանի իշխանությունները ի վիճակի չեն կատարել երկրի տարածքային ամբողջականությունը վերականգնելու սահմանադրական պարտավորությունները և չեն ցանկանում»:

«Ղարաբաղ կոմիտե»-ն կարծում է, որ իշխանությունների 27-ամյա քաղաքականությունը ղարաբաղյան հիմնախնդիրը լուծելու համար անհաջող է և հակասում է Ադրբեջանի ազգային շահերին և ինքնիշխանությանը:

Հայտարարության հեղինակների կարծիքով՝ կառավարությունը, խաղաղ բանակցությունների պատրվակով, պատրաստում է ժողովրդին պարտվողական խաղաղության:

Նրանք նշում են, որ եթե իշխանությունները չփոխեն քաղաքականությունը և այն չհամապատասխանեցնեն ադրբեջանական պետության սկզբունքներին ու շահերին, կոմիտեն ժողովրդին կտանի զանգվածային բողոքների և անհնազանդության։