ՄԱԿ-ը Վրաստանին կորոնավիրուսի դեմ պայքարի համար 1 միլիոն դոլար է հատկացրել

Վրաստանն այն առաջին 46 երկրների ցանկում է, որոնք ՄԱԿ-ի կորոնավիրուսի դեմ պայքարի հիմնադրամից ֆինանսական աջակցություն կստանան խոցելի խմբերին համավարակի պատճառով առաջացող սոցիալ-տնտեսական շոկից պաշտպանելու համար. այս մասին տեղեկացնում է pia.ge-ն։

Նշվում է՝ մայիսի 15-ին հիմնադրամը 1 միլիոն դոլար է հատկացրել Վրաստանում ՄԱԿ-ի մասնաճյուղերին` առողջապահության ոլորտում ճգնաժամին արձագանքելու և խոցելի խմբերին համավարակի սոցալ-տնտեսական հետևանքներից ազատելու  նպատակով։

Այս առնչությամբ Վրաստանի կառավարության աշխատակազմի ղեկավար Նատիա Մեզվրիշվիլին ասել է. «Այսօր կորոնավիրուսի ստեղծած իրավիճակի պատճառով մեր հիմնական նպատակն է փրկել մեր քաղաքացիների կյանքը, դադարեցնել վիրուսի տարածումն ու հաղթահարել դրա տնտեսական հետևանքներն ու վերականգնել կայուն տնտեսությունը: Մենք բարձր ենք գնահատում բոլոր միջազգային գործընկերների աջակցությունը համավարակի հաղթահարման և հետճգնաժամային զարգացման խթանման գործում»։