Թուրքիան նվազեցնում է դեպի Սիրիա ջրի մատակարարումը՝ վտանգի ենթարկելով մի քանի միլիոն սիրիացու

Եփրատ գետի մակարդակը վերջին երկու շաբաթներին իջել է 60 տոկոսով։ Թուրքական կառավարությունը կրճատել է գետի ջրի հոսքը. հայտնում է Fırat գործակալությունը։

Նվազեցնելով ջրի հոսքը՝ Թուրքիան լուրջ խնդիրներ է ստեղծում երկրի հատկապես հյուսիսային շրջանների համար՝ վնաս հասցնելով գյուղատնտեսությանը և էլեկտրահաղորդակցությանը։

Ըստ երկու երկրների միջև ձեռք բերված պայմանավորվածության՝ Սիրիան ստանում էր վայրկյանում 500 խորանարդ-մետր ջուր։ Սակայն այժմ Թուրքիան այն օգտագործում է որպես շանտաժի և ճնշման մեթոդ։ 2017 թ. Թուրքիան ջրի ծավալը նվազեցրել էր՝ հասցնելով 100-ի, իսկ այս տարի չի անցել 200-ից։

Էլեկտրաէներգիա ստանալու համար անհրաժեշտ է նվազագույնը վայրկյանում 300 խորանարդ-մետր ջուր։ Նշվում է, որ Եփրատի ջրերի նվազեցումը սպառնալիք է մի քանի միլիոն սիրիացիների համար։