Մահացել է Ռուբեն Շուգարյանը. Արարատ Միրզոյանը ցավակցել է

ՀՀ ԱԺ նախագահ Արարատ Միրզոյանը ցավակցական ուղերձ է հղել Ռուբեն Շուգարյանի մահվան կապակցությամբ: Այս մասին Yerkir.am-ին տեղեկացնում են ԱԺ աշխատակազմից:

«Սրտի խոր կսկիծով տեղեկացա անկախ Հայաստանի պատմության լավագույն դիվանագետներից մեկի` Ռուբեն Շուգարյանի անժամանակ մահվան մասին: Դեռ ջերմ են հիշողությունները նախորդ տարի Բոստոնում տեղի ունեցած մեր վերջին հանդիպումից, որտեղ ապրում եւ դասավանդում էր Թաֆթսի համալսարանում:

Հանգչի՛ր խաղաղությամբ, մենք կորցրինք ոչ միայն փայլուն դիվանագետի, այլեւ օրինակելի եւ սկզբունքային քաղաքացու քո տեսակը»:

Նշենք, որ Ռուբեն Շուգարյանը 1992-1993 թվականներին եղել է ՀՀ նախագահի մամուլի քարտուղարը։ 1993-1999 թթ. նա ԱՄՆ-ում Հայաստանի դեսպանն էր: 2001-2005 թթ. եղել է ՀՀ արտաքին գործերի նախարարի տեղակալը, 2005-2008 թթ.՝ Հայաստանի դեսպանը Իտալիայում: