Հալեպ-Դամասկոս կարևոր մայրուղու վերանորոգումը սկսվել է

Սիրիայի իշխանությունները գրոհայիններից ազատված Հալեպ և Սարակիբ քաղաքների շրջանում ընկած հատվածում սկսել են Հալեպ-Դամասկոս մայրուղու վերանորոգման աշխատանքները. հայտնում է Yerkir.am-ը՝ ՌԻԱ «Նովոստի»-ին հղումով:

Նշվում է՝ վերանորոգման աշխատանքները կատարվում են արագացված ռեժիմով, որպեսզի ապահովվի բնակչության տեղաշարժը: 

M5 մայրուղին Սիրիայի հիմնական ավտոճանապարներից է, որն իրար է կապում մայրաքաղաք Դամասկոսը երկրի տնտեսական կենտրոն համարվող Հալեպի հետ:

Մինչև վերջերս այս մայրուղով երթևեկությունն ամբողջովին անհնարին էր, քանի որ այն գտնվում էր գրոհայինների հսկողության տակ: Մայրուղու վերջին հատվածը Սիրիայի կառավարական ուժերի վերահսկողության տակ է անցել վերջերս, երբ նրանք գրոհայիններից ազատեցին Սարակիբը:

Միևնույն ժամանակ հավելվում է՝ մայրուղուն կից բնակավայրեր են սկսել վերադառնալ այստեղի բնակիչները, որոնք ստիպված էին եղել լքել իրենց տները գրոհայինների պատճառով: