Հռոմի Ֆրանցիսկոս պապը միջուկային զենքից հրաժարվելու կոչ է արել

Հռոմի պապ Ֆրանցիսկոսը ատոմային ռումբից տուժած Հիրոսիմա եւ Նագասակի քաղաքներ այցից մեկ օր անց համաշխարհային առաջնորդներին կոչ է արել երաշխավորել, որ միջուկային զենքն այլեւս երբեք չի օգտագործվի, ըստ  Yerkir.am-ի հայտնում է Reuters-ը։

Միջուկային ապառազմականացումը Հռոմի պապի` Ճապոնիա  այցի կարեւոր թեման է դարձել։

«Ես կոչ եմ անում անհրաժեշտ բոլոր միջոցները կիրառել, որպեսզի Հիրոսիմայի եւ Նագասակիի ատոմային ռմբակոծությունները երբեք չկրկնվեն մարդկության պատմության մեջ»,- Ճապոնիայի վարչապետ Սինձո Աբեի հետ հանդիպման ժամանակ հայտարարել է պոնտիֆիկոսը։

Աբեն ասել է` Ճապոնիան հավատարիմ է առանց միջուկային զենքի խաղաղության գաղափարին։

Միջուկային ապառազմականացումը եղել է նաեւ Պապի եւ կայսր Նարուխիտոյի հանդիպման թեման։ Ֆրանցիսկոս պապը պատմել է իր մանկական հիշողությունների մասին, թե ինչպես էին իր ծնողները լալիս՝ լսելով Հիրոսիմայի եւ Նագասակիի վրա հարձակման  մասին և որ դա իր վրա անջնջելի տպավորություն է թողել։