Բախումներ Բեյրութի կենտրոնում՝ ցուցարարների և կառավարության կողմնակիցների միջև

Երեքշաբթի Բեյրութի կենտրոնում՝ Ռինգ էստակադի մոտ, տեղի են ունեցել բախումներ ցուցարարների և կառավարության մեջ մտնող կուսակցությունների ակտիվիստների միջև. հայտնում է ՏԱՍՍ-ը՝ Al Hadath հեռուստաալիքին հղումով:

Նշվում է, որ շիա «Ամալ» շարժման կողմնակիցները փորձել են ուժով ապաշրջափակել դեպի էստակադ տանող անցումը, որն իրար է միացնում մայրաքաղաքի արևմտյան և արևելյան թաղամասերը: 

Անվտանգության ուժերը և լիբանանյան բանակի զինվորականները կասեցրել են ծեծկռտուքը՝ միաժամանակ մխրճվելով երկու ճամբարների ցուցարարների մեջ։ Ըստ նախնական տվյալների՝ բախումների ժամանակ տուժել է 6 մարդ։

Բախումներն սկսվել են վարչապետ Սաադ Հարիրիի հնարավոր հրաժարականի մասին տեղեկությունից հետո։ Al Hadath-ի տեղեկություններով՝ դեպի Բեյթ էլ Ուասաթի նրա նստավայր են ուղարկվել լրացուցիչ ոստիկանական կազմավորումներ։

Իրավապահները բավականին ուժեղացրել են իրենց ներկայությունը մայրաքաղաքի կենտրոնական հրապարակներում, որոնք լի են ցուցարարներով։