Ադրբեջանում Ֆրանսիայի դեսպանը կանչվել է ԱԳՆ

Ադրբեջանում Ֆրանսիայի արտակարգ և լիազոր դեսպան Զաքարի Գրոսը նախօրեին հրավիրվել է երկրի ԱԳՆ, որտեղ նրան է հանձնվել բողոքի նոտա՝ Երևանում ֆրանսիական Օվերն-Ռոն-Ալպ շրջանի խորհրդի նախագահ Լորան Վոկիեի և Արցախի ԱԳՆ Մասիս Մայիլյանի միջև հանդիպման և դրա արդյունքում կնքված համատեղ հռչակագրի կապակցությամբ:

Ադրբեջանի ԱԳՆ փոխնախարար Խալաֆ Խալաֆովը հայտնել է, որ նման քայլերը բացասաբար են ազդում բանակցային գործընթացի վրա և «աջակցություն են օկուպանտ Հայաստանին»: Փոխնախարարը նշել է նաև, որ ԵՄ առաջատար ու ԵԱՀԿ Մինսկի խմբի համանախագահ երկներից մեկը ստվեր է գցում Փարիզի միջնորդական առաքելության վրա. հաղորդում է ադրբեջանական «Թուրան» գործակալությունը:

Ֆրանսիացի դեսպանից բացատրություն է պահանջվել: Դեսպանը նշել է, որ տեղական և քաղաքային իշխանությունների գործողությունները չունեն որևէ իրավական ուժ և չեն արտահայտում ֆրանսիական կառավարության դիրքորոշումը:

Նշենք, որ Մայիլյանի և Վոկիեի միջև ստորագրված հռչակագրում մասնավորապես նշվում է, որ Արցախի ժողովրդի մեկուսացումը խոչընդոտում է նրա կողմից իր հիմնարար իրավունքների և ազատությունների իրացմանն ու հակասում ազատության, հավասարության և համագործակցության ոգուն, առանց որոնց տարածաշրջանում ամուր խաղաղության հաստատումն անհնար է: