Արա Գյուլերի ցուցահանդեսի բացման ժապավենը Ճապոնիայում կկտրի Էրդողանը

Թուրքիայի նախագահ Ռեջեփ Թայիփ Էրդողանը այս շաբաթ կկտրի թուրքահայ լուսանկարիչ Արա Գյուլերի` Կիոտոյում կայանալիք ցուցահանդեսի բացման ժապավենը:

Լոնդոնում և Փարիզում աշխարհահռչակ լուսանկարչի հաջող ցուցահանդեսներից հետո հունիսի 30-ից հուլիսի 10-ը Կիոտոյի Տոֆոքուջի տաճարում տեղի կունենա հերթական ցուցահանդեսը:

Էրդողանը Ճապոնիայի Օսակա քաղաքում է, որտեղ տեղի է ունենում G-20 երկրների ղեկավարների հանդիպումը:

Ցուցահանդեսի բուկլետները անգլերեն, թուրքերեն և ճապոներեն լեզուներով կբաժանվեն G-20 երկրների ղեկավարներին. հաղորդում է «Անադոլու» գործակալությունը:

Նշենք, որ Արա Գյուլերը ծնվել է 1928 թ. Ստամբուլում, դեղագործ Տաճատ Տերտերյանի ընտանիքում: Իր գործունեության ընթացքում արժանացել է մի շարք նշանավոր մրցանակների: Մահացել է 2018 թ. հոկտեմբերի 15-ին 90 տարեկան հասակում: