Արցախում կարկտահարությունից տուժածներին կտրամադրվի աջակցություն

Մայիսի 28-ին հանրապետությունում տեղացած կարկուտը մեծ վնաս է հասցրել Ասկերանի և Մարտունու շրջանների ցանքատարածություններին:

Այս  մասին   «Արցախպրես»-ի  թղթակցի  հետ   զրույցում ասել է  ԱՀ  գյուղատնտեսության   փոխնախարար  Վիլեն  Ավետիսյանը:

Նա  նշել  է, որ  վերջին տասնամյակում   նման  կարկտահարություն  չի  եղել: Արցախի Հանրապետության գյուղատնտեսության նախարար Ժիրայր Միրզոյանի    ուղեկցությամբ նախարարության  աշխատակիցներն այցելել են  բնական աղետից ամենաշատը տուժած Մարտունու շրջան, որտեղ իրականացվել է Ճարտարի, Սոսի, Քերթի, Քարահունջի և Մաճկալաշենի ցանքատարածքների  և այգիների  դիտարկում: Դիտարկում  է իրականացվել  նաև  Ասկերանի շրջանում:Վ.  Ավետիսյանի  խոսքով՝    ԱՀ   գյուղատնտեսության  նախարարը տուժած հողատարածքների սեփականատերերին ու վարձակալներին հավաստիացրել է, որ կառավարությունն անպայման միջոցներ է ձեռնարկելու կորուստներ կրած հողօգտագործողներին աջակցություն ցուցաբերելու  համար:Մեր  զրուցակիցը  տեղեկացրել է  նաև, որ  համապատասխան մասնագետներին հանձնարարվել է կազմել բնական աղետից տուժած հողօգտագործողների  ցուցակը և ճշտել վնասների չափերը: