«Ձայնը. երեխաներ» հեռուստանախագծում հաղթող ճանաչվեցին եզրափակիչի բոլոր մասնակիցները, այդ թվում`արցախցի Միշան

Երեկ`մայիսի 24-ին, կայացավ ռուսական «Ձայնը. երեխաներ» հեռուստանախագծի հատուկ թողարկում, որի ընթացքում ամփոփվեցին նախագծի արդյունքները:

Հիշեցնենք, որ ավելի վաղ արդեն հաղթող էր ճանաչվել երգչուհի Ալսուի դուստրը՝ Միկելլան: Նրա հաղթանակից հետո աղմուկ բարձրացավ, և որոշում կայացվեց չեղարկել եզրափակիչի արդյունքները:

Հաղորդման այս եթերաշրջանին մասնակցում էին նաև երկու հայ փոքրիկներ՝ Ռոբերտ Բագրատյանն ու արցախցի Միշան։

Արդյունքներն ամփոփեց ռուսական «Առաջին ալիքի» տնօրեն Կոնստանտին Էռնստը: Նա մասնավորապես հայտարարեց. «Երկար քննարկումներից հետո հասկացել ենք, որ երկրորդ անգամ քվեարկություն անցկացնել չենք կարող, այդ իսկ պատճառով հաղթող են ճանաչվում բոլորը»:

Եզրափակիչ անցած բոլոր մասնակիցներին հաղթական արձանիկներ նվիրեցին և յուրաքանչյուրին` մեկ միլիոն ռուբլի:

Կոնստանտին Էռնստի վստահեցմամբ՝ «Առաջին ալիքի» եթերում ոչինչ չի վաճառվում։