Ստամբուլի քաղաքապետի ընդդիմադիր թեկնածուի համար մեկ օրում 5 մլն լիրա է հավաքվել

Թուրքիայի ընդդիմադիր Հանրապետական-ժողովրդական կուսակցության` Ստամբուլի քաղաքապետի թեկնածու Էքրեմ Իմամօղլուի` մարտի 31-ի ընտրություններում հաղթանակից հետո Բարձրագույն ընտրական հանձնաժողովը իշխող կուսակցության պահանջով ընտրությունների արդյունքները չեղյալ հայտարարեց: Նոր ընտրություններում Իմամօղլուին ֆինանսական աջակցություն ցուցաբերելու համար հայտարարված դրամահավաքում մեկ օրում հավաքվել է 5 մլն թուրքական լիրա:

Ըստ gazeteduvar.com.tr կայքի` կուսակցության փոխնախագահ Բյուլենթ Քուշօղլուն նշել է. «Հանուն ժողովրդավարության կազմակերպված այս դրամահավաքը վերածվել է մոբիլիզիացիայի: Ստացված արձագանքները մարդու աչքերը լցնում են»:

Իմամօղլուի համար աջակցություն է ստացվել ոչ միայն Թուրքիայից, այլև արտերկրից: Հունիսի 23-ին նշանակված նոր ընտրություններում ֆինանսական աջակցության ակնկալիքով ՀԺԿ-ն դրամահավաք էր սկսել`  մեկ հոգու համար նվազագույնը սահմանելով 20 լիրա: