Սահմանապահի օրը տոն է ոչ միայն ԱԱԾ սահմանապահ զորքերի, այլև զինված ուժերի ու ժողովրդի համար. Փաշինյան

Հայաստանի Հանրապետություն ասելով՝ առաջին հերթին մենք նկատի ունենք մեր սահմանները, որովհետև այդ սահմաններով է տեղորոշվում մեր տեղը Երկիր մոլորակի վրա, մեր տեղը՝ արևի տակ, մեր ապագան և անցյալի մասին մեր պատկերացումը. ԱԱԾ սահմանապահ զորքերի օրվան նվիրված միջոցառմանը ելույթն այսպես սկսեց վարչապետ Նիկոլ Փաշինյանը։

Նա ընդգծեց` սահմանապահ ծառայությունը չափազանց կարևոր նշանակություն ունի, և հայտնի հանգամանքների բերումով` սահմանապահ լինելը ոչ միայն աշխատանքային կոչում է, այլև առաքելություն։ Իսկ այդ առաքելությունը, նշեց նա, պատվով են կատարում սահմանապահ զորքերի ծառայողները։

«Մեր երկրում այսօր դե ֆակտո գոյություն ունի «սահմանապահ բնակավայր» հասկացությունը, և այդ առումով Սահմանապահի օրը տոն է ոչ միայն ԱԱԾ սահմանապահ զորքերի, այլև զինված ուժերի ու ժողովրդի համար»,- հավելեց վարչապետը: