Թուրքիան հրավիրում է հայերին` այցելել Աղթամար

Թուրքիայի նախագահի աշխատակազմի հանրային կապերի վարչության նախագահ, ազգայնական հայացքներ ունեցող Ֆահրեթթին Ալթունը, որը երեկ անդրադարձել էր Հայոց ցեղասպանությանը, իր թվիթերյան էջում Վանի Աղթամար կղզու վերաբերյալ գրառում է կատարել:

«Աղթամարի եկեղեցին, որը վերանորոգվել է թուրքական կառավարության կողմից, մեր ազգի հարուստ պատմության և մշակութային յուրահատկության ապացույցն է: Մենք հրավիրում ենք ամբողջ աշխարհի հայ հասարակությանը` այցելել պատմակական ժառանգություն համարվող այս վայր»,- գրել է նա:

10-րդ դարում կառուցված հայկական եկեղեցին 2010 թ. վերանորոգվել էր, սակայն ստացել էր թանգարանի կարգավիճակ, և թույլատրվել է տարին միայն մեկ անգամ անցկացնել պատարագ: