Չի բացառվում, որ «Սպայկա»-ի` պետական բյուջե չվճարած 7 մլրդ դրամն ավելանա. ՊԵԿ նախագահ

Չի բացառվում, որ «Սպայկա» ընկերության` պետական բյուջե չվճարած 7 մլրդ դրամն ավելանա, քանի որ մենք ունենք 3,5 տարվանն առնչվող առերևույթ հանցագործություն պարունակող վարքագիծ: Այդ մասին կառավարությունում լրագրողների հետ զրույցում ասաց ՊԵԿ նախագահ Դավիթ Անանյանը:

«Ոչ միայն չի բացառվում, այլև ավելանալու է: Մենք այդ վարքագծի ընդամենը 30 տոկոսին առնչվող  ժամանակագրական առումով ունենք փաստաթղթեր: Ինչ ցույց կտան հաշվարկները չեմ կարող ասել»,- ասաց նա՝ նշելով, որ այս պահին վարչապետն ու ինքն այդքան էլ իրավասու չեն տեղեկատվություն ներկայացնելու:

«Իրավական գործընթաց է գնում, և այստեղ ամենակարևոր մարդը քննիչն է, և նա է փաստական հանգամանքների վերաբերյալ  դատողություններ անում` մասնագետների հետ խորհրդակցելով: Եվ եթե  նա ունի այնպիսի համոզմունք, որ տնօրենի` ազատության մեջ գտնվելը կվնասի քննությանը, միջնորդում է դատարանին, որն էլ այդպիսի որոշում է կայացնում կամ կայացրել: Իրավական գործընթաց է գնում, և դրա վերաբերյալ վարչապետն ու ՊԵԿ նախագահը որևէ  գնահատական չեն կարող տալ: Հետևաբար` քանի դեռ քրեական գործը քննվում է, քննություն է գնում, քննչական գործողություններ կատարվել և կատարվելու են` հավանաբար, մենք կախված ենք այսօր քննիչի որոշումներից»,- շեշտեց Դավիթ Անանյանը: