Բաքուն շտապել է արձագանքել Դավիթ Տոնոյանի հայտարարությանը

Ինչպես հաղորդում է haqqin.az-ը, Ադրբեջանի ԱԳՆ մամուլի ծառայության ղեկավար Վագիֆ Դարգյաղլին արձագանքել է ՀՀ պաշտպանության նախարար Դավիթ Տոնոյանի այն հայտարարությանը, որ  այսուհետ «Տարածքներ՝ խաղաղության դիմաց» ձևաչափը վերաձևակերպում է  «Նոր պատերազմ՝ նոր տարածքների դիմաց» սկզբունքով: Բաքուն տարակուսած է, այդ ինչպես է ՀՀ վարչապետը դրական գնահատել Վիեննայում Փաշինյան-Ալիև բանակցությունները, եթե հաջորդ օրը ՀՀ պաշտպանության նախարարը նման հայտարարությամբ է հանդես գալիս:Ըստ Ադրբեջանի ԱԳՆ-ի, սա վկայում է այն մասին, որ Հայաստանի իշխանական օղակներում քաոս է տիրում: Ադրբեջանի ԱԳն-ն շարադրել է քարոզչական նյութ` հայկական բանակի խոցելիության և ադրբեջանական բանակի անխոցելիության վերաբերյալ, իսկ Տոնոյանի հայտարարությունը որակել աբսուրդային:

«Տոնոյանի հայտարարությամբ պաշտոնական Երևանը սպառնում է Ադրբեջանի տարածքային ամբողջականությանը: Դա անհարգալից վերաբերմունք է միջազգային իրավունքի և նորմերի նկատմամբ»,- ասել է նա: