Թյուր տպավորություն կա, թե մենք ուզում ենք խաչ քաշել Սփյուռքի նախարարության վրա. Փաշինյան

Նախընտրական քարոզարշավի ժամանակ մենք խոստացել ենք, որ կառավարության կազմը պետք է փոխվի, և նախարարությունների թիվը կրճատվի, և մենք անշեղ պետք է գնանք այդ ճանապարհով. այսօր կառավարության նիստի մեկնարկին հայտարարեց ՀՀ վարչապետի պաշտոնակատար Նիկոլ Փաշինյանը:

Նա նշեց, որ նախարարությունների կրճատման նպատակը փող խնայելը չէ, այլ կառավարության և պետական մարմինների արդյունավետության բարձրացումը:

«Այս առումով շատ լուրջ աշխատանք է սպասվում, մենք տարբեր քննարկումներ ենք ունեցել կառավարությունում և դեռ էլի քննարկումներ կունենանք: Այս ընթացքում կլսենք բոլոր տեսակետները և կկայացնենք առավել բալանսավորված որոշում: Սփյուռքի նախարարության հետ կապված կարծում եմ` թյուր տպավորություն կա, թե մենք ուղղակի ուզում ենք խաչ քաշել նախարարության վրա: Չկա նման բան, ընդհակառակը` ուզում ենք Սփյուռքի հետ համագործակցությունը դարձնել առավել արդյունավետ, ինչի համար մենք որոշակի մոդել ունենք: Այդ մոդելի արդյունքում Սփյուռքի հետ հարաբերություններն ավելի ակտիվ կլինեն, և այդ մոդելի շուրջ մենք քննարկումներ կանենք Սփյուռքի ներկայացուցիչների հետ»,- ասաց Փաշինյանը:

Նրա խոսքով` գնալու են հետևողական և հաստատուն քայլերով: