Հիզեր Նոերթը` ՄԱԿ-ում ԱՄՆ մշտական ներկայացուցիչ

ՄԱԿ-ում ԱՄՆ մշտական ներկայացուցչի պաշտոնը կզբաղեցնի ԱՄՆ պետքարտուղարության պաշտոնական ներկայացուցիչ Հիզեր  Նոերթը: Այս մասին որոշումը կայացրել է ԱՄՆ նախագահ Դոնալդ Թրամփը:Այս պաշտոնում Նոերթը կփոխարինի Նիքի Հեյլիին, որն ավելի վաղ հայտարարել էր պաշտոնը լքելու մտադրության մասին:

Հիզեր Նոերթի նշանակման մասին որոշումը ողջունել է ԱՄՆ պետքարտուղար Մայք Պոմպեոն. «Շատ ուրախ եմ ԱՄՆ նախագահ Դոնալդ Թրամփի՝ ՄԱԿ-ում ԱՄՆ մշտական ներկայացուցչի պաշտոնի համար Հիզերի թեկնածությունը առաջադրելու մտադրության համար: Նա ուղեկցել է ինձ ուղևորությունների  ժամանակ որպես հանրային դիվանագիտության եւ հասարակայնության հետ կապերի գծով տեղակալ եւ մամուլի ծառայության ղեկավար: Ես վստահում եմ նրան», - «Twitter»-ի իր միկրոբլոգում գրել է նա՝ հավելելով, որ Նոերթն առանցքային դեր է կատարում ամերիկյան արտաքին քաղաքականության առաջխաղացման գործում: Պոմպեոն հույս է հայտնել, որ Սենատը շուտ կհաստատի պաշտոնում Նոերթի նշանակումը: