ԵԱՀԿ ՄԽ համանախագահները Երևանին և Բաքվին կոչ են արել բնակչությանը նախապատրաստել խաղաղության

Միլանում` ԵԱՀԿ նախարարների խորհրդի նիստի շրջանակում, ԵԱՀԿ Մինսկի խմբի համանախագահները, Հայաստանի արտգործնախարարի պաշտոնակատար Զոհրաբ Մնացականյանը և Ադրբեջանի արտգործնախարար Էլմար Մամեդյարովը համաձայնության են եկել շարունակել աշխատանքները Լեռնային Ղարաբաղի հակամարտության արդար և հարատև խաղաղ կարգավորման շուրջ:

ԵԱՀԿ Մինսկի խմբի պաշտոնական կայքէջում տարածված հայտարարության համաձայն` համանախագահները ողջունել են Դուշանբեում Հայաստանի և Ադրբեջանի ղեկավարների պայմանավորվածությունից հետո հրադադարի խախտման դեպքերի և զոհերի թվի զգալի նվազումը:

Նրանք կողմերին կոչ են արել կյանքի կոչել այնտեղ ձեռք բերված պայմանավորվածությունները և հստակ միջոցներ ձեռնարկել բնակչությանը խաղաղության նախապատրաստելու ուղղությամբ:

Համանախագահները հույս են հայտնել, որ Հայաստանի և Ադրբեջանի առաջնորդների միջև ինտենսիվ, արդյունքների ուղղված, բարձր մակարդակի երկխոսությունը կնպաստի մոտ ապագայում հակամարտության արդարացի և հարատև կարգավորմանը:

Հայաստանի ԱԳ նախարարի պաշտոնակատարն ու Ադրբեջանի ԱԳ նախարարը վերահաստատել են իրենց  հանձնառությունները՝ շարունակել ինտենսիվ աշխատանքները հակամարտության խաղաղ կարգավորումը խթանելու և հետագա լարվածությունը թուլացնելու ուղղությամբ:

Նման բարձր մակարդակով բանակցություններ նախապատրաստելու նպատակով կողմերը համաձայնել են հանդիպել 2019 թվականի սկզբին` ԵԱՀԿ Մինսկի խմբի համանախագահների հովանու ներքո: