Չպետք է շփոթել պատասխանատվությունը մեղավորության կամ մեղքի հետ. Ալավերդյանը՝ Մարտի 1-ի գործին Քոչարյանի առնչության մասին

ՀՀ մարդու իրավունքների նախկին պաշտպան, «Ընդդեմ իրավական կամայականությունների» ՀԿ-ի գործադիր տնօրեն Լարիսա Ալավերդյանը հանդես է գալիս որպես մարդու իրավունքների պաշտպան նաև այն դեպքերում, երբ խախտվում են ՀՀ երկրորդ նախագահի իրավունքները: 

«Ցանկացած իրավիճակում մարդու իրավունքները պետք է պաշտպանված լինեն»,- լրագրողների հետ զրույցում նշեց նա:

Անդրադառնալով Մարտի 1-ի համար պատասխանատվության հարցին` Ալավերդյանը հիշեցրեց, որ 2008-ի մարտի 1-ին տեղի է ունեցել ԱԺ արտահերթ նիստ, և ինքը հարց է դրել՝  ցանկացած իրավիճակում երկրի կանոնակարգված գոյությունը կախված է միայն իշխանություններից, և հետագայում ընդդիմության գործողությունները պետք է դիտարկվեն այդ համատեքստում: 

«Ես այն ժամանակ էլ եմ ասել, որ տեղի ունեցածի համար պատասխանատվություն է կրում հենց նախագահը և ընթերցել եմ Սահմանադրության համապատասխան հոդվածը, բայց պետք չէ շփոթել պատասխանատվությունը մեղավորության կամ մեղքի հետ»,- հավելեց  նա: